ابوذيات رحيم المالكي

من هَـمّي الصخـور تـموع و تـذيـب

وعَـلي دِنـياي تِجمَع ضَيَـم وِ تـذِب

إبـن آوى إنجمَع و الـضبـع و الـذيـب

اليطلع الشّـاة ويـنه البـيه حَـميّـة

عَـليك الروح تِسأل ما تـَسَلهة

و تِدري إنتَ العُـواذِل ما تِسِلهة

شِمتـاني سيـوفـك ما تِسِلهة

إذا للضّيـج مَـرّ الضّيـج بـيّـة

ألِـف دِنـياي كِـلهة ما تِـلِفـني

عَـنيد و غـير شَخصك ما تِلـَفـني

عِـمَت عـين المَناية ما تِـلِـفـني

أهِـز دِنـيـة و مَرَة تِـلعَـب عَـليّـة

سِـبّـاح گـلبـي من حَـشاكـُم

وعَـليّـة من العَـواذِل مَن حَـشّاكم ؟

أسِب وأرجع وأگولـن مِن حَـشاكـُم

إعـزاز و من أسِب تِـرجع عَـليّـة

ضلوعي بحَـرْ سِموم الصَيف شَـتـّن

عـلى ضعـون المِـشَـن وبـليل شَـتـّن

يَگـَلبي شمِنـتِـظِـر بالـباب شِـتــّان ؟

سِـرَو غـَبـشة و مِـشَو من غـَير جَـيّـة

يَـكاد الثـوب يـِنشَگ من نـَهَـدهة

و فـَرَح ما شاف گـلبي من أهَدْهَـة

بَـيْ حَـسْـرة عَـليهة من أهِـدْهـة

الـوادِم تِـحـتِـرِگ و آنـة سُـويّـة

عَـليك اللـيـل كِـلـّه آنةوانة

و معاك العِـتـَب هَسّة آن أوانـه

إتـّهَـدّد بالنِـفـاهـة آنـة وانـة

وَينـَك مُو طـُبَگ دَهـري عَـليّـة

أنـَة الواضِح و الِـمبَـيّـن ولا خـاف

و أنـَة الما رِجـفـَن جـدامي ولا خـاف

و آنـَة الما نِگـَص وَزنـي ولا خـَف

إخـتِـفـَيَـت و خـُفِـت خـَف وَزني العَـليّـة

لأن طـَگـّات شِمّاتـي بَـهامـــــاي

وَشّـل لا تِـضِـن عـيـني بـِها ماي

إذا عَـالذِل رِضَة يـبـصُم بَـهاماي

أگِطـعَـه الچـان يـرضالي بـرِدِيّـة

أنـَـــــــة روحي الِلـيـالي مَـرّسَـنـهَـة

الأصيـلة إنتَ تـعَـرِفـهَـة من رِسَـنهَـة

سيـوفـي ما غـمَـدِتـهَـة مَـرّة سِنـهَـة

رگـاب عـداي مُـبـرَدهِـن و إدَيّـة

يَـگلـبي ما نِـفـَع تـَعـبَـك ولا ربـاك

و حِـصتـَك صارَت الـدوخـة و الإرباك

بـطـَريـقـك بَعَـد ما أعايـن ولا أربـيـك

مِـن أطـيعَـك هَـم تِـردني لحَـفـر حَـيّـة

أكابـِر مــــــا أصيحَـن آخ جَـلـداي

يـا سوط الشِـماتـة عُـوف جَـلـداي

لـَحـم الحـيا طِـلـَع و إنـّـزَع جـِلـدي

لـَچَـن ثابـِت و روحـي ذيـچ هِـيّـة

روحي تـشـوف كِـل ذنـّي قـدَرْهة

الزمَـن و النـاس ما تِـعـرف قـدَرْهة

الـعَـواذِل قِـيـسني ويـاهُـم قـدَرْهـة

عَـلـيهُـم أوصَـل لـنـَجـم الـثـَرَيـّــــة

يَـدِنـياي المُصايـب عَـلـَي جَـدْري

إيـتِگـالـَب ما بُـرَد فـَد يـوم جـِدري

أنـة الظـَلـّيَت چَـن مَصيُـوب جـِدري

اليَـراني يـشيـل و يـعُـوف الـثِـنِـيّـة

يَـدِنـيَـة بلـومي و شَـكـواي حِـسّي

و عَـن وَجـهـي غـُبـار الضَيَـم حِـسّي

أظـَل أصرَخ و أصيـح بـعِـلـو حِـسّي

لـَمَـا تِحِسّـيـن يا دِنـيـاي بـِـيـّــــــة

أغـَـيّـم و أمطِـر و أنخـُبـِط و أصْـفـة

على اللِـي راح مِـنـّي و تـاه وَصْـفـه

حَـبـيـبـي و چـان إلِـي لبَـلـواي وَصْـفة

أشِـگ الچـِفـَن لـو مَـر طـَيـفـَه بـيـّـة

عـلى عِـداي من أطـيحَـن خـَردَل أنـّي

يــــــــا وَسْـــفـة اللِـيـالـي خـَردِلـَـنـّي

عُـگـُب ما چـِنِـت مُـصمَـك خِـردَة لـَـنـّي

گِـمِـت ما يـِنـشَـرَة و يـِنـباع بـيـّـة

و حَـگ مَـن كـَوّن الأكـوان و أبْـسَـط

آنـَة أسهَـل مِـن نِسيم الـريح و أبْـسَـط

چـِنِـت أمـلِك مَـخـَدّة صُـوف و بـسـاط

الإجـونـي فــَرْهِـدَو ذنـّي مـن إدَيـّـــــة

أنـة الـما أكـَرّر بـحَـچـيـي ولا أعـيـد

ولا أحـسِـب بـزَلاّتـك ولا أعِـــد

شـمالـَك ما تـُمِـر بـيّـة ولا عِـيـد

الخـَلل مَـدْري بـجَـنابَـك مَـدْري بـيّـة

گِـمِت ما أرفِـس بـرِجـلي ولا أدِچ

ولا أطـعَـن الـيــِطعَـنـّي ولا أدِچ

دِيـرَة و ما شِـفِـت بـيـهـة ولا ديـچ

اليـِعـوعي الصُبـح و يـصَحّـي البَـريّـة

جَمالك بالگـلـب و الروح طـَرفـاي

شَـعْـرَك فـَيْ جَـبـيـنـَك نـور طـَرْ فـَيْ

أحَـذرَك لا تِـدوس بـيـوم طـَرفِـي

أوِج كِـلـّي و طـَرَف ما يـِظـَل بـِـيّـة

ها دَگ الگـلب بـِجـفـاك ها رَف

هاك إخـذ الجـروح وياك ها رُوف

مِـثِـل خِـزلة غـَنم و تـشوف هـارِف

شَـتـّن مِـشَـن كِـل وِحـدة بـنِـويّـة

المِـثـلي شلون يـِنسَة مِـثِـل فـَضله

عِـطـَش گـلبي و حبـيـبـي أنهـار فـَض له

الـكـَرَم من راس جـِدره مُـوش فـَـضلة

ولا يـِنـطي و تـَحَـسّـف بـالعِـطِـيّـة

إلـَك مِـنـّي رسالـة شـوگ نـَصّـاً

يَـالـمِـنـّك جـبال الـشـــــــام نـَصّـن

مُـو حَگـّه دِلـيـلي إنجـِسَم نِـصّـيـن

نِـص إلـكـَم و الآخـَر للأذيـّــــــــة

حَبـيـبـي جـروح إلك بالـرّوح حالـَن

و أمِس چـِنت أحسَن من اليـوم حالاً

أريـدَك تـنـتِـخـيـلي و تـُمُـر حالاً

باچـِر ويَـن ما تِـلحَـگ عَـلـَيـّـــة

الله يرحمه ويتغمد روحه الجنه

عاشت ايدج غاليتي على هالاختيار المميز

دمت بالف خير

الله يرحمه

وايديج حبي تسلمين على المرور شرفتيني

تحياتي الج

عاشت الا يادي نور مشاركه رائعه

عاشت ايدك عالرد نورت الموضوع

تحياتي الك نور النجف

» ابوذيات هديه لاحلى بنات وشباب
» المالكي يؤكد أهمية التمسك بالدستور والمصالحة
» المالكي يؤكد أهمية التمسك بالدستور والمصالحة
» ما الفرق بين احمد نوري المالكي وعدي صدام ؟