بعد ماريد فيزة ولا لجوء أنسان
عمت عين الأقامة الدنست صيتي
وأشكر كل صديق وكل خوي وكل جار
قفل بابه ورفض يقبل عراقيتي
خلف الله عليكم والوكت دولاب
لابد يوم ينزل بيكم أرضيتي
لأن أول امس كل البشر خدام
جانوا للعراق وأكلوا ابيتي
جان الضيف عندي مكرم ومهيوب
فوك الراس أشيله وهاي تربيتي
ما داعي أسولف آني أبو نهرين
ياهو الما سمع أخبار حنيتي
بعد بصمات أديهم والطبع موجود
من جانوا جياع بوسط صينيتي
يادنيه حرام ومنكر ومكروه
أذا بأبن العراق اليوم وطيتي
معقولة نسيتي أسم العراق بساع
لو مثل البشر همن تناسيتي
ميفيد الحجي ولاتنفع الجلمات
راجع ياوطن لترابك لزيتي
راجع يا حبيبة كلبي يا بغداد
وأدري بكثر ما ونيت ونيتي
وأدري لوحدج عفناج صار سنين
وأدري من الحزن تابوت سويتي
جيب الأغتراب وحطه بالتابوت
يا غربة العراق شكثر أذيتي
ما اعيش ابحرمالح طعم ياناس
أنا بسجن الفرات وفقط حريتي
وترابي ذهب والكاع من ياقوت
ومن ثوب الكرامة ألبـسـهه بيريتي
وأذا كالوا لترجع والوضع مو زين
اكول آني الوضع والزين تاليتي
وميهمني بعد اليصير خل يصير
طعم الموت أشرف من هجر بيتي
أموت بوسط خوتي ويا حلاة الموت
من أجمع أهلنه وأكتب وصيتي
أوصيتي لو متت لا تجفنوني أجفان
لفوني بعلمنه وهاي أمنيتي
وأذا تردون اليه بهالكبر أرتاح
أمانة الله دفنوا وياي جنسيتي
::::::::::::::::::::::::::::::::::::::::::::::::::::::::::
::::::::::::::::::::::::::::::::::::::::::::::::::::::::::::::::::::
:::::::::::::::::::::::::::::::::::::::::::::::::::::::::::::::::::::::::::::
الرئيسية 
أحدث الصور 
موضوع: عتب للدول العربية 
الإثنين أبريل 13, 2009 9:12 pm
